Йӑлана кӗнӗ тӑрӑх, Ҫӗнӗ ҫул умӗн Шупашкарта ретро-троллейбус маршрут ҫине тухӗ. Вӑл 1-мӗш маршрутпа ҫӳрӗ.
Раштав уйӑхӗн 30-мӗшӗнче ҫула тухакан ретро-троллейбусра Хӗл мучипе Юр пике пулӗҫ, вӗсем пассажирсене кӗтсе илӗҫ. Салона гирляндӑсемпе, «кӗмӗл ҫумӑрпа» илемлетнӗ.
Троллейбус 9 сехет те 25 минутран пуҫласа 18 сехет те 25 минутчен ӗҫлӗ. Апатлану вӑхӑчӗ те пулӗ. «Ӑслӑ транспорт» сарӑмра 1964 ҫулта кӑларнӑ ЗиУ-5 троллейбуса Р саспаллипе шыраса тупма май пулӗ.
Ҫӗнӗ ҫулта ваттии те, вӗтти те тӗлӗнтермӗш кӗтет. Юлашки вӑхӑтра пирӗн облаҫра та, Раҫҫейре те Хӗл Мучине ҫыру ярасси анлӑ сарӑлчӗ. «Ӗмӗт чӑрӑшӗ» кашни субъект правительствинче, муниципаллӑ пӗрлӗхре пур. Ачасем унта Ҫӗнӗ ҫул уявӗнче хӑйсем мӗн пирки ӗмӗтленнине ҫырса яраҫҫӗ.
Чӗмпӗрте пурӑнакан чӑваш ачин Гриша Петровӑн та ӗмӗчӗсем пысӑк. Вӑл Хӗл Мучине хӑй ашшӗпе час-часах УАЗ машинӑна юсанине, ҫавӑнпа та вӗсене юсама ҫӑмӑлтарах пултӑр тесе мӗнле туса кӑларнине курас килни пирки ҫырса янӑ.
Ульяновск хула администрацийӗн «Ӗмӗт чӑрӑшӗ» ҫинчи ҫырӑва хула пуҫлӑхӗ Дмитрий Вавилин илсе вуланӑ. Вӑл Гришӑн ӗмӗтне хаваспах пурнӑҫланӑ. Мӗншӗн тесен пуҫлӑхӑн пӗрремӗш ӗҫ вырӑнӗ — автозавод. Сӑмах май каласан, Гришӑн аслашшӗн Петр Петровӑн пӗрремӗш ӗҫ вырӑнӗ те — УАЗ.
Предприяти ӗҫченӗсем пуҫлӑхпа Гришӑна тӗп конвейер ӗҫне кӑтартнӑ. Кунта пӗр вӑхӑтрах 500 ҫын вӑй хурать — пӗр йӗр ҫинче «Патриотсем», «Хантерсем», «Профи», иккӗмӗшӗнче — «Буханкӑсем», «Фермерсем» тата ытти модельсем пухаҫҫӗ. Ачана пурте интереслӗ пулнӑ: машшин рамисене, ун ҫине мостсем, передачӑсен коробкипе двигателе вырнаҫтарни, рабочисем детальсене мӗнле майлаштарни тата ытти те.
Раҫҫейре Ҫӗнӗ ҫул умӗн ырӑ йӑла пурнӑҫланма тытӑнать: «Ӗмӗтсен чӑрӑшӗ» акци. Сывлӑх енчен хавшак ачасем хӑйсен ӗмӗчӗ пирки ҫыраҫҫӗ, вӗсем чӑрӑш ҫинче ҫакӑнса тӑраҫҫӗ. Тӳре-шара, ахаль ҫынсем акцие хутшӑнса чарӑш ҫинчи теттене илеҫҫӗ те ачан ӗмӗтне пурнӑҫа кӗртеҫҫӗ.
Шупашкар районӗнчи 15 ҫулти Владимир Васильев ДЦП-па кӗрешет. Вӑл ашшӗ-амӑшӗпе, аппӑшӗпе пурӑнать. Арҫын ача юмахсем, юрӑсем итлеме юратать. Ҫавӑнпа Ҫӗнӗ ҫулта интерактивлӑ тетте-медиаплеер илме ӗмӗтленнӗ. Ку ӗмӗте Шупашкар хула администрацийӗн пуҫлӑхӗ Денис Спирин пурнӑҫланӑ.
Владимирӑн амӑшӗ Елена Васильевна ывӑлӗн ӗмӗчӗ пурнӑҫланнӑшӑн питӗ савӑннӑ.
Шупашкарта ҫынсем машина тӑррине чӑрӑш лартнӑ водителе асӑрханӑ. Вӑл тӗрлӗ тӗспе йӑлтӑртатнӑ. «Волгӑна» гирляндӑпа тата мишурапа илемлетнӗ.
Ҫынсем «Про Город» хаҫата каласа кӑтартнӑ тӑрӑх, машина Шупашкартан Ҫӗнӗ Шупашкар еннелле кайнӑ.
«Ҫул тӑршшӗпех манпа пычӗ. Ахӑртнех, Ҫӗнӗ Шупашкарта пурӑнать», - каласа кӑтартнӑ халӑх корреспонденчӗ.
Чӑваш Енре Ҫӗнӗ ҫулхи каникул валли 50 пин экспресс-тест илсе хурӗҫ. Вӗсемпе массӑллӑ мероприятисене хутшӑнакансене кӑшӑлвируспа чирленипе чирлеменнине тӗрӗслӗҫ.
Хальхи вӑхӑтра республикӑра 100 пин ҫынран 321,3 ҫынна тест тӑваҫҫӗ. Раштав уйӑхӗччен ковидпа чирлӗ ҫынпа хутшӑннисене ПЦР-тест тунӑ. Халӗ вара ОРВИ симптомӗсем пулсан ҫеҫ тест тӑваҫҫӗ. Ку йӗрке Раҫҫей тӗп санитари тухтӑрӗн йышӑнӑвӗпе килӗшӳллӗн улшӑннӑ.
ЧР Элтеперӗ Олег Николаев массӑллӑ мероприятисене хутшӑнакансене пурне те тест тумалли пирки каланӑ. Ҫав шутра экспресс-тестсем те пулӗҫ. Чӑваш Ен валли уйӑрнӑ 50 пин тест-экспресс 10 миллион та 750 пин тенке кайса ларӗ.
ЧР Элтеперӗ Олег Николаев «Ӗмӗтсен чӑрӑшӗ» ҫинчен пӗр юр пӗрчине илнӗ те унта Шупашкарти Рома Кожевниковӑн ӗмӗчӗ пулнӑ. Эппин, Олег Алексеевичӑн ӑна пурнӑҫламалла. Аса илтерер: ҫӑк ятпа акци иртет.
4 ҫулти Рома пуйӑссемпе, чукун ҫулпа кӑсӑкланать. Вӗсене ӳкернӗ кӗнекесене вӑл сехечӗ-сехечӗпе пӑхса ларма пултарать. Ҫавна май ЧР Элтеперӗ ӑна пультпа ҫӳретме май пур чукун ҫул парнеленӗ. Олег Алексеевич Ромӑн аппӑшне Софийӑна та парне панӑ. Хӗрача бисерпа тӗрлемелли хатӗршӗн, пылак ҫимӗҫсемшӗн тата кӗнекешӗн питӗ савӑннӑ.
София Шупашкарти 65-мӗш шкулта вӗренет. Амӑшӗ Татьяна Леонидовна ача ҫуратмалли ҫуртра медсестрара тӑрӑшать. Ашшӗ Илья Вадимович ача пӑхассипе отпускра ларать.
Паян оперштаб ларӑвӗ иртнӗ. Ҫӗнӗ ҫул уявӗсем епле иртессине Роспотребнадзорӑн Чӑваш Енри управленийӗпе пӗрле сӳтсе явнӑ.
Ведомство ертӳҫин ҫумӗ Вера Головач пӗлтернӗ тӑрӑх, кӑҫал та, пӗлтӗрхи пекех, массӑллӑ мероприятисене ирттерме юрамӗ. Театрсемпе концерт залӗсенче спектакльсем кӑтартма юрать, анчах чӑрӑш тавра тӑрса юрлама ирӗк паман. «Хальлӗхе, шел те, чӑрӑш тавра тӑрса юрлама иртерех», - тенӗ Вера Головач.
Аса илтерер: ача пахчисемпе шкулсенче те уявсем ушкӑнра, класра иртӗҫ. Ашшӗ-амӑшне унта QR-кодпа ҫеҫ кӗртӗҫ.
Оперативлӑ штабӑн черетлӗ ларӑвӗнче Ҫӗнӗ ҫулхи уявсене сӳтсе явнӑ. Роспотребнадзорӑн Чӑваш Енри управленийӗн ертӳҫи Надежда Луговская Ҫӗнӗ ҫулта та хальхи чару мерисене хӑварма сӗннӗччӗ. ЧР Элтеперне Олег Николаева пӗр пункт ҫеҫ иккӗлентернӗ: раштавӑн 31-мӗшӗнче кафесем ҫур ҫӗр иртни 1 сехетчен ӗҫлесси.
Олег Алексеевич ҫак тапхӑрта кафесене хупма сӗннӗ. Хальлӗхе ку йышӑнӑва туман-ха. Сӑмах май, корпоративсем ирттерме те чарнӑ. Шкулсенче, ача пахчисенче уява класра, ушкӑнра ирттерме сӗннӗ. Ашшӗ-амӑшне QR-кодпа е справкӑпа кӗртмелле.
Ҫӗнӗ ҫул умӗн Чӑваш Енре пурӑнакансене Хӗл мучи патне мар, футболистсем патне ҫыру ҫырма сӗнеҫҫӗ. Анчах ҫырура парне ыйтмалла мар, хӑвӑрӑн пурнӑҫри футболпа ҫыхӑннӑ историе каласа памалла.
Акцие Раҫҫей почти пулӑшнипе йӗркелеҫҫӗ. Вӑл – Раҫҫейӗн футбол енӗпе пӗрлештернӗ командин официаллӑ партнерӗ. Ҫырӑва чи лайӑх ҫыракансене парне параҫҫӗ: футболистсен автографӗллӗ мечӗк. Чи маттуррисене вара кашни тунтикун, чӳкӗн 22-мӗшӗнчен пуҫласа, суйлӗҫ. Юлашкине кӑрлачӑн 10-мӗшӗнче палӑртӗҫ.
Ҫырӑва ҫак адреспа ӑсатмалла: 115172, г. Москва, ул. Народная, д. 9. «Конкурс Почта сборной» тесе палӑртмалла. Е электронлӑ адреспа ямалла: pochtasbornoy@rfs.ru.
Ҫӗнӗ ҫулччен вӑхӑт нумаях юлмарӗ. Чӳк уйӑхӗн 15-мӗшӗнче Чӑваш Енре Пӗтӗм Раҫҫейри «Ӗмӗтсен чӑрӑшӗ» акци пуҫланнӑ.
Проектпа килӗшӳллӗн, ачасем ӗмӗтленнӗ парнене тивӗҫеҫҫӗ. Ку акци кашни ҫулах пурнӑҫланать.
Ачасен ӗмӗчӗсем кӗҫех пурнӑҫланӗҫ. ЧР Элтеперӗ Олег Николаев «Ӗмӗтсен чӑрӑшӗнчен» пӗр хута илнӗ. Унта – Шупашкарти Рома Кожевниковӑн ӗмӗчӗ. Вӑл пультпа ҫӳретмае май пур чукун ҫул пирки ӗмӗтленет. Ӑна Олег Николаев пурнӑҫлатех.
+10.3 °C